الى كل من تركها حبيبها من اجل مرض (الطائفيه)

صدك تقبل حبيبي لغيري هسه تصير ؟؟

وصدك مليت مني وبعد متحبني ؟؟

وصدك هانت عليك اسنينه الحلوات

وماهانت عليك شلون تتركني؟؟

من يمته المذاهب نحسبلهه حساب؟؟

ومن يمته الطوائف جانت تهمني؟؟

آنه لمن عشكتك ماسالت الناس

ولاجنت ادري اصلك شيعي لو سني

شجاك تغيرت وبكلبك اتنه شصار؟؟

جنت تموت بيه وجنت تعبدني

وجنت اتنفسك وانت الهوه بدنياي

وجنت لو تبتعد لحظات ..تخنكني
معقوله الورد ينكر جميل الماي؟؟

وانت بهالسهوله تنازلت عني؟؟

ماأنكر مقصر اجت فتره وياك

لكن موبديه الوكت يجبرني

شفت يمك نفط وابين اديك الماي

وآنه بنار اشتعل ردتك تخلصني

لكيتك بالعكس مايك شمرته ابعيد

وجبت النفط بيدك حته تحركني

شسولفلك بعد ؟ طعم السوالف راح

ردت منك توافي وخيبت ظني

أدري الوكت هو الخله كلبك هيج
وادري الطائفية الباكتك مني

وقبل لا تبتعد عندي سؤال ارجوك

فكر ويه روحك عود وجاوبني :

باجر لو متت وتشوفني بتابوت

هم تبجي عليه وبعد تذكرني؟؟؟؟؟؟؟؟؟؟؟