كل كلمه تسولف عنك وعني

كل كلمه تسولف عنك وعني
وكل همسه التصل منك تذوبني
يبستان الورد ومحمر الخدين
على بابك غصب رجليه جابني
أكتبلك قوافي وأجمل الأوزان
أصحه وألگه شعري بيك يكتبني
نثر ليلي نجومه بدربك متانيك
يهل حسنك بدر يجمعها ويغني
يغار الفجر منك من ضوه خدودك
حتى ألجوري عنك دوم يسألني
أخاف تروح عني ويبقه عمري عليك
بس أسنين تغفه بحســرتي أو وني
وأخاف تروح عني وگلبي طگ بركان
يذوبني ودمعــــــــي ينگلب حني
رهني حسنك ومجبور احبك موت
ومدري ليش حسنك دوم يجبرني ؟
ما مليت حبك حتى بأصعب الحالات
وأخاف تدور بيه الدنيا وتملني
يلي بعيد عني وبس صدى صوتك
على جنح الهوى مرات يوصلني
انه المجروح خاطر ما تحن يفلان
يا هلبت حنانك مـــــــره جَبرني
أنه المحروگ گلبي وأحسب الساعات
ولهيبك ماطفه لســــــــــــاع حارگني
تســـــــــالني أحبك ليش يا عمري
إذا تعرف جوابه ليش تســــــــألني
أنت النفس بالريه ونبض شريان
وحبيبي وخاطري وأحساسي وظني
يا أجمل قصيده عيونك الحلوات
وشفافك الميمر بالوفه تغني
وفاي وياك شط وحاضن الجرفين
وحبك طيف ما ليله يفارگني
أباريلك وأخاف عليك من روحي
يطگ بيها الصبر والغيره تاخذني
وتدري من الهوى يا روحي أغار عليك
لو لاعب گـــذلتك أنگلب جـــــني
الگاك بوريدي لو ادورك يوم
وبدرب الصبر والحيره شاتلني
تعبت هواي يالمزيون ما ترحم
يوم ألقيامه هواك يرحمني؟؟

روعه احسن النشر

نورت بهل كلمات الجميلة واسعدنا تواجدك معنى

الله الله عليك 

تستحق القب ومبروك علي الوسام
لانك نستحقه
ويارب ماننحرم من الشعراء الذواقين

الله عليك ياراقي كلمات جميله
تقبل مروري

شكراً لكم وعلى مروركم العطر الذي اسعدني