يلعيونك سمه

يلعيونك سمه وطول الحواجب ليل

ضمني بسمه عيونك اسهرواغفه

ويا ضي الوجه يالماطفيت بيوم 

صدكني الكمر من يشتعل يطفه

ويا قوس القزح كل ساعه اشوفك لون

ويمر مرات لونك بيه ما عرفه

تحل ليل الشعر حد مايلوح الكاع

وتعظ الزلوف بدورة الشفه

طبع بينه الجرح ندعيله حتى يطيب

الك بيه جرح ادعيله مايشفه

وتسالني شعجب ماوصفيتك يوم

وانه الحايربظلك لسه مموصفه

يبو صوت اليغرد ياسحر فيروز

لك اجمل لحن بشفافك تعزفه

تمر مثل النهر والخطوه روجة ماي 

واظل لنه اعله جرفك حاصد الوسفه

ويالخصرك مدور كمر عالي بعيد

مد ايده الكلب مالاحك بجفه

ويكولون التمر ينضرب بيه امثال

اشو جبت التبرزل صارلك حشفه

من عينك نده ينزل وشوفه يطيح 

يلتم بورود جفوفك الترفه 

تلتف اعله طولك كل نجوم الليل 

ويجي ينام الكمر متوسدك صفه

واظم سرك عليه وما ابوحن بيه

واذا دمعك بعينك عيني لتذرفه

كل اصبع بجفك يضوي شمعه بليل

وكل خصلة شعر من كذلتك عفه

يا جمار عالي وما ظن تنلاح 

لان عثكك هدل ماشالته السعفه

اذا بميزان ناته وكل حواري العين

ماظنن لغيرك تنزل الكفه

يا اول نده ينكط شعر للروح

ويلمشذر محبه وضحكتك زفه

شمس الله واكبر نزلت اعله الكاع

اجت يمك حبيبي تريد تدفه

روعه عاشت اناملك وزدت ابداعا

عاشت الايادي قصيده كلش اكثر من حلوه
الابداع والتالق دوما يارب

كلام جميل 
وطله اجمل 
يارب التميز الدائم
تقبل مروري

شكراً على مروركم العطر واحاسيسكم الرائعه