شحجي وتريد الناس من عندي أحجي
دمعتي إبطرف العين بس أحجي أبجي
أقبل صباح اليوم ابدنيتي هـــاي
شلت الردا أوفزيت لن عيني بهواي
لانفع نصحي أوياك لانفع لــــومي
أنا ادري مامحضوض راح ابقى دومي
حقي من أحامي إعليـــج ياشجرة التيـن
ماي الربيـــتي إعليه من دمعة العيــن
لاواشي لانمام يبعدني عــنك
بس النجف يهواي ياخذني منك
تيزاب أحط بالعين واعميها بجـــفاك
خافن تصد للغير أوتنسى المضى أوياك
الدهر بس وياي راكب إحصانــــه
ويكًًــلي وين إتروح جدامـك آنـه
بالـك تمر بالدار عنها إشمر إبعيـد
دار العزيز هواي نوح وبجي إتريـد
عمداً أمر بالدار والنـوح أزيــــده
وأسمع صداهـا إيكًـول راح التريـده
عمداً أمر بالدار وأشبع مغمــه
وابجي بجي المفطوم ومفارك أمه
الدنيه للتهواه ترقص امفرعــه
والماتريده بنوح لو خلص دمعه
متعجب بدنياك جرحتك مــره
منخل اقليبي صار بيه العمه يقره
أرد أسـأل العشاك ليش آنه مشتــاك
نايم إبحضن إهـواي واشكي من الفراك
ميت والمعزيــات موش أمهـاته
مايبجـَن إعله المات يبجـن شماته
ميت والمعزيات يبجن عيـــــاره
ويرمـن على التابوت كَطف الجكًاره
ميت والمعزيات مابيهن أمــــه
وحده التشـتم بيه وحـده التـغمه
همــك .. وهم الناس .. وهم هم الأيـام
وفوكــاها هم العين ماتقبل إتنـــــام
همك وهم الناس وهم الله فــــــوكـه
صاحت عليــه الناس جن عندي بوكــه
متعجـب المهمــوم يشرب جكــاره
كًًلبي بكثر ما نــوح تجويـني ناره
همــك .. وهم الناس وهم هم الهموم
لو وحده منهن بيــك ماتكًًدر إتكـوم
طقني أو طحت للقاع قلت اكتفى البين
طقاني مره النور أوخر ضوى العـين
الردكل دقش أعلى الراس بسش يدنياي
مطقوقه باليافوخ ماشوفن احــداي
اصغير وخاف إعليك من شـــدة الاه
اشنون احمل أنا افراق واصبر بلا اياه
الرداصغير وخاف اعليك من حضن امك
ابقلبي وقول ابعيد جاوين اضمــك
تاري البنات اشكال مثل الجفافـي
وحده التضل للغير أواحده التوافي
أشرب واريـد أنساك واسكر واذكـرك مو بالعظم ويطيــب بالكًلب كســرك
كل مرض لامابيك ياخويا محسود
اوحق اليحسدك داخ بعيونك السود
منك سمعت الاه كثرت جراحـي
وشبيدي خويا اعليك قصوا جناحي
وين الكفن ينباع يالشايل الخـــــام
عدله أرد أطمها الروح من ظيم الأيـام
لم جرحك أو للبيت قوم امشي ويـاي
وامشي ابدلال أرجوك لاتشمت اعداي
كَـالولي ولفـك راح كَلتلهم أبعد
كَـالو صعد للغيـم كَلتلهم أصعد
من كثر حر الضلع أحترقن هدومي
وتسعين ناقة وجمل ماشالن همومي