شعر طالب يريد يصارح بنيه

شعر طالب يريد يصارح بنيه وياه بالقسم

طالب وعايف دروسي واقرا اشعار وجرايد
وعاشگ بنيه بقسمنه والگلب بس الها رايد
هي حلوة ..هواية حلوة.. واني عمي شلون واحد
بالفرن ناسيني اهلي وحتى لون عيوني جارد
حاولت الفت نظرها بكل وسيلة وماكو فايد
غيرت لبسي.. ومشيتي ..وفكري بالمودات شارد
وجللت شعري وصبغته ولبست حتى گلايد
گعدتني ع الحديدة ..لا بعت حتى الحدايد
لا تگلي ولا اگلك بهذلتني الله شاهد
وهي تدري بس ة مثولة والدلال بارد
وانه نار بنص دليلي خاف اصارحها وتعاند
مرة اگول ...احجي وياها... ومرة اگول.. اضل راكد
وين چانتلي يربي.. چنت متونس وگاعد
وقررت لازم ابوح بحبي الها وما احايد
بوري ما بوري اسولف قابل مصارح مجاهـد
جيت وتقربت يمها جسمي يرجف حيلي بايد
والضغط يمي تخربط مرة نازل مرة صاعد
گمت اتمتم ..گمت اعتعت.. گمت احس بلساني جامد
چني سيارة عتيگه وانكسر من عدها گايد
ردت افلت ما عاد ينفع گالت اتفضل شرايـــد
گلت عفواً ..من رخصتچ ...بلكي عندچ قلم زايـــد