تعال وشوف جرحك شيب من الاه
ودمعاتي اعله فكدك صادقه النيه
محتاجك تلم روحي الصفت دخان
وترسملي شمع ضوه بصوانيه
انه ضنوني يتيمه وجاهه غفله العيد
عيد ابلا جديد شتنفع الجيه
سوالف حزني ترجمهه السكوت اهات
وعلى صرح الحزن دمعاتي مبنيه
على كبه ضريح احساسي طير يعيش
يغردلك , تعال اسمع معانية
يكلك صورتك دكت وشم بالروح
ومثل السيف روحي اعليك محنيه
حوافر خيل بعدك كسرتلي ضلوع
وصرتلهن درب بالروحه والجيه
وشلت راسي برمح سميته انت فراك!
علم راسي صبح والرمح ساريه
ودموعي سبايه انكادت من العين
على انياك الجفن اخذوهه مسبيه
ولا فكرت انسه ودعاتك يهواي
وصغت اسمك بذان الوكت ترجيه
على خطوات بعدك اثر دمعي الطاح
وعلى بيبان جرحك صوره مرجيه
شعره من الحزن صابغهه جف الشيب
وتجاعيد بوجه بي عبره مخفيه
عباره انكتبت بشفة يتيم يلوع
اكبر غايه عنده يشوف اهاليه
وانه من اصرخ بصوتي يرد عليه الصوت
لاتصرخ قضيتك كلهه منسيه
وانه بحبك جرف حاظن بجرفه الماي
شتظن الجرف يتخله عن ميه
الأحد يونيو 03, 2012 10:53 pm